ដីកាកោះហៅលោក កឹម សុខា លើកទី២ ត្រូវបានសមត្ថកិច្ចយកទៅបិទដល់មុខផ្ទះ នៅខណ្ឌទួលគោក
18-May-2016 | ដោយ មែន កំសត់
ភ្នំពេញ៖ ដីកាកោះហៅ លោក កឹម សុខា ប្រធានស្តីទីគណបក្សសង្គ្រោះជាតិ (កោះហៅលើកទី២) ដែលចេញដោយព្រះរាជអាជ្ញារង លោក សៀង សុខ ត្រូវបានសមត្ថកិច្ច យកទៅបិទដល់មុខផ្ទះរបស់លោកតែម្តង នៅថ្ងៃទី១៨ ខែឧសភា ឆ្នាំ២០១៦នេះ។
ផ្ទះលោក កឹម សុខា ដែលសមត្ថកិច្ចយកទៅបិទដល់នោះ គឺស្ថិតនៅផ្ទះលេខ៩៧ ផ្លូវ៣១៣ សង្កាត់បឹងកក់២ ខណ្ឌទួលគោក ដែលលោក កឹម សុខា ត្រូវចូលបំភ្លឺនៅតុលាការ នាថ្ងៃទី២៦ ខែឧសភា ឆ្នាំ២០១៦ ក្រោមបទចោទប្រកាន់ពីបទ សញ្ចារកម្ម ។
សូមជំរាបថា ព្រះរាជអាជ្ញារងអមសាលាដំបូងរាជធានីភ្នំពេញ លោក សៀង សុខ បានចេញកោះហៅលោក កឹម សុខា ប្រធានស្តីទីគណបក្សសង្គ្រោះជាតិ ជាលើកទី២ ឲ្យចូលទៅបំភ្លឺលើដំណើររឿងពាក់ព័ន្ធនឹងអំពើសញ្ចារកម្ម នៅថ្ងៃទី២៦ ខែឧសភា ឆ្នាំ២០១៦ វេលាម៉ោង ៩៖០០នាទីព្រឹក។ យោងតាមដីការថ្ងៃទី១៧ ខែឧសភា ឆ្នាំ២០១៦ ដែលទទួលបានបានឲ្យដឹងថា «លោក សៀង សុខ បានរំលឹកឲ្យលោក កឹម សុខា ត្រូវចូលតាមដីកាកោះឲ្យបានទាន់ពេលវេលា»។
សាលាដំបូងរាជធានីភ្នំពេញ ធ្លាប់បានចេញដីកាកោះហៅលោក កឹម សុខា ម្តងរួចមកហើយកាលពីថ្ងៃទី០៦ ខែឧសភា ឲ្យចូលទៅបំភ្លឺលើសំណុំរឿងសញ្ចារកម្មនៅថ្ងៃទី១៧ ខែឧសភា ម្សិលមិញនេះ តែលោក កឹម សុខា មិនបានចូលខ្លួនតាមដីកាកោះនេះឡើយ។
សូមបញ្ជាក់ថា ការកោះហៅលោក កឹម សុខា ធ្វើឡើងតាមពាក្យបណ្តឹងរបស់កញ្ញា ខុម ចាន់តារ៉ាទី ហៅស្រីមុំ ដែលអះអាងថា នាងមានទំនាក់ទំនងស្នេហាជាមួយលោក កឹម សុខា។ ស្រីមុំ បានលើកឡើងក្នុងលិខិតចំហរថា លោក កឹម សុខា បានធ្វើឲ្យប៉ះពាល់សេចក្តីថ្លៃថ្នូរ កិត្តិយសផងដែរ។ ស្រីមុំ បានប្តឹងទាមទារសំណងជំងឺចិត្តប្រមាណ ៣០ម៉ឺនដុល្លារ ពីលោក កឹម សុខា និងអ្នកពាក់ព័ន្ធមួយចំនួន៕
ចំនួនអ្នកទស្សនា
- ថ្ងៃនេះ7571
- ម្សិលមិញ12561
- សប្តាហ៍នេះ35521
- ខែនេះ57401
- ឆ្នាំនេះ57401
- សរុប20499857